Farþega Titanic minnst í sérstakri siglingu

Breska farþegaskipið Balmoral lagði í gær af stað í sérstaka siglingu til að minnast þeirra sem létu lífið í Titanic slysinu fyrir hundrað árum. Uppselt var í ferðina en skipið mun sigla sömu leið og Titanic gerði í jómfrúarferð sinni.

Næstkomandi sunnudag verða nákvæmlega hundruð ár liðin frá því Titanci sökk við Nýfundnaland eftir að hafa siglt á borgarísjaka. Skipið var þá á leið frá Evrópu til bandaríkjanna.

Balmoral lagði af stað frá Southampton í Englandi í gær en um borð eru meðal annars afkomendur þeirra sem létu lífið í slysinu.

„Fjölmargir afkomendur eiga bókað far með skipinu sem siglir í dag. Þeir geta ekki hugsað sér betri leið til að minnast ástvina sinna en að fara á slysastaðinn þann 14.- 15. apríl nk.," segir Miles Morgan, skipuleggjandi ferðarinnar.

Um fimmtán hundruð manns létu lífið þegar Titanic sökk.

„Ekki voru nægilega mörg björgunartæki fyrir alla um borð í skipinu. Stöðug hlustunarvakt fjarskipta var ekki viðhöfð í þá daga. Fjölmargar nýjungar á sviði siglingaöryggis voru kynntar í kjölfar slyssins," segir Ronald Warwick, fyrrverandi skipstjóri.