Sprengjumaður á Suðurnesjum áfram í gæsluvarðhaldi

Að kröfu lögreglustjórans á Suðurnesjum var í gær gæsluvarðhald framlengt yfir karlmanni sem tekinn var með rörasprengju og hlaðið skotvopn á heimili sínu í Reykjanesbæ í síðustu viku.

Héraðsdómur Reykjaness gerði manninum að sæta gæsluvarðhaldi til 26. mars næstkomandi.Úrskurðurinn hefur verið kærður til Hæstaréttar.

Maðurinn var handtekinn eftir að lögreglu barst ábending um varasama hegðun mannsins á Facebook. Þar mátti meðal annars sjá manninn munda skotvopn og sprengja sprengjur. Á heimili mannsins fundust svo efni til sprengjugerðar, kindabyssa og og hnífar. Maðurinn réðist að sérsveitarmönnum vopnaður hnífi þegar hann var handtekinn. Maðurinn hefur sætt gæsluvarðhaldi síðan.