Björn ætlar að áfrýja meiðyrðadómi

Björn Bjarnason ætlar að áfrýja niðurstöðu Héraðsdóms Reykjavíkur til Hæstaréttar. Tvenn ummæli Björns, sem finna mátti í bók hans, Rosabaugur yfir Íslandi, voru dæmd dauð og ómerk í morgun. Héraðsdómur dæmdi Björn að auki til þess að greiða Jóni Ásgeir Jóhannessyni alls fjögur hundruð þúsund krónur vegna ummælanna. Annars vegar tvöhundruð þúsund krónur í miskabætur og svo 200 þúsund krónur til þess að standa straum af birtingu dómsins í opinberum fjölmiðli.

Jón Ásgeir stefndi Birni fyrir þrenn ummæli. Meðal annars sagði Björn í bók sinni að Jón Ásgeir hefði verið dæmdur fyrir fjárdrátt. Það reyndist ekki rétt, hann var dæmdur fyrir bókhaldsbrot.

Ummælin sem voru dæmd dauð og ómerk voru: „Hæstiréttur staðfesti niðurstöðuna frá 28. júní um 19. ákæruliðinn um fjárdrátt með þeim rökum að um greinargóða sundurliðun væri að ræða á einstökum kreditreikningum. Var Jón Ásgeir því dæmdur fyrir fjárdrátt og í 3 mánaða skilorðs­bundið fangelsi …"

Hin ummælin voru:

„ … að því er varðaði ákæruliði 11-17 um meiriháttar bókhaldsbrot og rangfærslu staðfesti hæstiréttur niðurstöðu héraðsdóms frá 3. maí um sekt Jóns Ásgeirs …"

Í niðurstöðu dómsins segir: „Við ákvörðun viðurlaga verður að líta til þess að stefndi hefur leiðrétt um­mælin á áberandi hátt og beðið stefnanda afsökunar á þeim. Það leiðir hins vegar ekki til þess að hann verði sýknaður af kröfum stefnanda."