Almannavarnir: Varað við stormi á Suðausturlandi

Almannavarnadeild Ríkislögreglustjóra vill vekja athygli á því að Veðurstofan varar við stormi (meðalvindi yfir 20 m/s) á Suðausturlandi, Austfjörðum og á Miðhálendinu í kvöld og nótt. Einnig er spáð verulegri samfelldri úrkomu í kvöld og fram á nóttina.

Vegfarendur eru hvattir til að kynna sér veður og færð áður en lagt er upp í ferðir. Þá er rétt að benda á að stórstreymt er þessa dagana og verður straumur mestur á laugardag.

Viðvörun Veðurstofunnar hljóðar svo:

Veðurstofa Íslands vill vekja athygli á að kröpp lægð mun fara hratt yfir austurhluta landsins í kvöld og nótt og fylgja henni snarpar veðrabreytingar. Í kvöld gengur í vestan 18-25 m/s, fyrst syðst en síðan á öllu austanverðu landinu. Vindhviður við fjöll geta farið yfir 40 m/s. Í fyrramálið minnkar vindur talsvert, og lægir smám saman á morgun.