Hetja Spánverja í kvöld: Við óttumst ekki Ronaldo

Xabi Alonso er ekki mesti markaskorarinn í spænska landsliðinu en hann sá einn um markaskorunina í kvöld er Spánverjar köstuðu Frökkum út úr Evrópumeistaramótinu.

Alonso, sem var að spila sinn 100. landsleik, skoraði mark með skalla og svo úr vítaspyrnu í 2-0 sigri.

"Liðið var ótrúlegt og ég er persónulega mjög ánægður með mörkin tvö," sagði brosmildur Alonso en Spánn mætir Portúgal í undanúrslitum keppninnar.

"Við sköpuðum ekki mörg færi en við stýrðum leiknum algjörlega. Mikilvægasta skrefið er alltaf það næsta. Við þekkjum Ronaldo en erum ekki hræddir við hann."