Mourinho: Lygi að halda því fram að Real spili leiðinlegan fótbolta

Jose Mourinho, stjóri Real Madrid, gefur ekki mikið fyrir þær fullyrðingar að Real Madrid spili leiðinlega knattspyrnu.

Real er nú í efsta sæti spænsku úrvalsdeildarinnar með þriggja stiga forystu á erkifjendurna í Barcelona.

„Real Madrid hefur verið að spila mjög vel. Þeir ljúga sem segja eitthvað annað og að við höfum bara áhuga á úrslitum leikjanna," sagði hann í viðtali sem birtist á heimasíðu félagsins.

„Við spilum vel, skemmtum áhorfendum sem halda áfram að koma á völlinn til að horfa á okkur spila. Santiago Bernabeu er alltaf smekkfullur, sama við hverja við erum að spila."

Mourinho sagðist ekki vera á leið frá félaginu. „Það eru mörg góð ár fram undan. Við eigum enn eftir að ná okkar besta fram og ég myndi aldrei ganga frá hálfkláruðu verki."