Lagarfljótsormurinn fyrir sannleiksnefnd

Sveitarfélagið Fljótsdalshérað hefur skipað þrettán manna sannleiksnefnd til að skera úr um hvort Hjörtur Kjerúlf hafi í raun og veru náð mynd af Lagarfljótsorminum.

Ef svo er verður hann hálfri milljón ríkari. Bæjarstjórn Egilsstaða, sem þá var og hét, efndi til samkeppni árið 1997 þar sem þeirri upphæð var heitið þeim sem tækist að festa orminn á filmu. Engum tókst það þá en bæjarstjórnin brást við með því að heita þeim sem það tækist í framtíðinni að vitja verðlaunanna. Nú hefur Hjörtur farið til bæjaryfirvalda með myndband upp á vasann sem sýnir orminn á svamli, að því er hann fullyrðir.

„Það var maður sem benti mér á þetta svo ég ákvað að spyrja þá hvort þetta myndband mitt væri verðlaunanna virði,“ segir Hjörtur.

Björn Ingimarsson, bæjarstjóri Fljótsdalshéraðs, segir að þessu máli sé tekið alvarlega en hann er þó ekki of sannfærandi. „Við brugðumst við með því að skipa þessa sannleiksnefnd en ég legg ríka áherslu á að hún taki sér þann tíma sem hún þarf,“ segir hann. „Líklegast verður sannleiksnefndin að störfum út kjörtímabilið,“ bætir hann við og hlær en ítrekar svo aftur að yfirvöld á Héraði taki þessu máli af mikilli alvöru.

Bæst hefur við verkefni nefndarinnar en eftir útspil Hjartar tók Sigurður Aðalsteinsson frá Vaðbrekku á Jökuldal við sér og sendi mynd sem hann segir vera af Lagarfljótsorminum. „Það hlýtur að gilda það sama um þá mynd og myndbandið hans Hjartar,“ segir bæjarstjórinn.

Þegar Hjörtur er spurður hvort hann trúi því virkilega að þarna sé Lagarfljótsormurinn á ferð svarar hann. „Þórbergur Þórðarson sagði það einkenni Héraðsbúa að þeir tryðu aldrei því sem þeir sæju. En ég er ekki þannig.“

Myndbandið hefur verið á Youtube-vefnum frá því í febrúar og eru skráðar á það fjórar og hálf milljón heimsóknir. Fjölmiðlamenn hafa líka leitað til Hjartar. „Það komu hingað bandarískir sjónvarpsmenn til að taka upp fyrir þáttaröð sína og vildu endilega fræðast um Lagarfljótsorminn,“ segir hann. „Þetta hefur verið góð kynning fyrir svæðið, ég held við séum bara komnir í bullandi samkeppni hér á Héraði við þá í Loch Ness á Skotlandi.“