Sameinuðu þjóðirnar kalla eftirlitsmennina heim

Sameinuðu þjóðirnar hafa ákveðið að draga eftirlitsmenn sína í Sýrlandi brott úr landinu. Umboð eftirlitsmannanna rennur út á sunnudaginn og stefnt er að því að síðasti eftirlitsmaðurinn verði farinn úr landinu á föstudaginn næsta.

Fyrr á þessu ári var ákveðið að senda þrjú hundruð óvopnaða eftirlitsmenn frá Sameinuðu Þjóðunum til Sýrlands til að fylgjast með samkomulagi um vopnahlé sem náðist við yfirvöld í Sýrlandi fyrir tilstilli Kofis Annans, erindreka Sameinuðu Þjóðanna. Skemst er frá því að segja að það samkomulag var ekki virt.

Átökin í Sýrlandi hafa stigmagnast síðan og fjöldi eftirlitsmannanna í landinu hefur smám saman verið skorinn niður. Síðan í júní hafa þeir verið kyrrsettir á hótelum til að tryggja öryggi þeirra. Nú hefur verið ákveðið að þeir rúmlega hundrað eftirlitsmenn sem eftir eru verði fluttir brott úr landinu.

Í staðinn hefur Öryggisráð Sameinuðu Þjóðanna samþykkt að setja upp einhvers konar samstarfs-skrifstofu í höfuðborg landsins, Damaskus, til að fylgjast með framvindu mála. Þar munu að líkindum starfa 20-30 sérfræðingar.

Um 23 þúsund manns hafa látist í Sýrlandi síðan átök hófust þar fyrir næstum einu og hálfu ári. Bardagar stóðu milli stjórnarhersins og uppreisnarmanna í Damaskus í nótt og í morgun. Einnig skaut herinn sprengjum á norðurhluta Aleppo borgar. Bardagar geisuðu einnig í gær þar sem um 180 manns létu lífið í landinu öllu.

Aljazeera segir frá.