Valtýr Sigurðsson: Óvenjuleg og kaldrifjuð árás

Valtýr Sigurðsson, fyrrverandi ríkissaksóknari, sagðist ýmsu vanur þegar hann bar vitni í réttarhöldunum yfir Guðgeiri Guðmundssyni í Héraðsdómi Reykjavíkur í morgun. Hann bætti við að hann hefði þekkt Skúla Eggert Sigurz lengi, en hrottafengin árás Guðgeirs á vinnufélaga Valtýs hefur haft mikil áhrif á hann.

Valtýr var einn af þremur vinnufélögum Skúla sem komu inn á skrifstofu hans eftir að Guðgeir hafði stungið hann fimm sinnum, þar af voru fjórar stungu lífshættulegar.

Þegar Valtý bar að voru þar fyrir annar lögmaður og svo Guðni Bergs sem lá ofan á Guðgeiri. Valtýr segir að hnífurinn hafi legið á miðju gólfinu, og hafi hann sparkað honum fjær Guðgeiri.

Á þessum tímapunkti studdi Skúli sig við skrifborð og blæddi mikið. Valtýr ákvað því að aðstoða Skúla sem muldraði tvívegis að Guðgeir hefði stungið sig. Valtýr lét hann leggjast á gólfið, þar sem hann hélt fótum hans uppi til þess að auka blóðstreymi til höfuðsins.

Allan þennan tíma var Skúli með meðvitund. Það var ekki fyrr en hann kom á spítalann sem hann missti meðvitund. Hann var svo í lífshættu næstu þrjár vikurnar.

Spurður út í breytta starfshætti á skrifstofunni vegna árásarinnar svararði Valtýr því til að það hefði verið farið yfir allar verklagsreglur eftir atvikið og öryggið hert.

„En svo komust við að því að þeirri niðurstöðu að venjulegar varúðarráðstafanir hefðu ekki getað komið í veg fyrir þetta. Árásin var það óvenjuleg og kaldrifjuð," sagði Valtýr að lokum.