Lögregla leitar enn byssumanns

Lögreglan í Tulsa í Oklahoma í Bandaríkjunum hefur enn ekki fundið byssumanninn sem myrti Kristján Hinrik Þórsson fyrir utan verslun á laugardagsmorgun.

Dave Walker, varðstjóri á morðdeild lögreglunnar í Tulsa, segir að karlmanns sé leitað. Hann sé svartur á hörund, grannur og tæpir 180 sentímetrar.

„Kristján Hinrik var heima hjá sér um eitt eftir miðnætti á laugardag. Nágranni Kristjáns og móður hans var í heimsókn og fóru þeir saman í verslunarferð," segir Walker. „Kristján beið í bílnum á meðan John White, nágranninn, fór inn í búðina."

Þegar White var sestur inn í bíl virðist allt vera í góðu. Þá ekur 18 til 20 ára gamall maður upp að bíl þeirra Kristjáns og einhvers konar orðaskipti verða. „Við höldum að hinn grunaði hafi sakað White um að hafa nærri ekið á hann. Þegar White ætlar að aka í burtu dregur maðurinn upp byssu og skýtur nokkrum skotum inn í bílinn."

Kristján lést við komuna á sjúkrahús en White dó í gær. Þeir voru báðir skotnir í höfuðið af stuttu færi.

„Rannsóknin gengur ekki eins vel og við myndum vilja en við erum ekki stopp," segir Walker. „Við erum að fá upplýsingar og ég er viss um að hægt verði að finna byssumanninn og koma honum á bak við lás og slá."- bþh