Brasilía og Suður-Kórea í undanúrslit | Bretar úr leik eftir vítakeppni

Brasilía og Suður-Kórea komust í kvöld í undanúrslit á Ólympíuleikunum í knattspyrnu. Brasilía vann í dag nauman 3-2 sigur á baráttuglöðu liði Hondúras á meðan Suður-Kórea vann lið Bretlands eftir vítaspyrnukeppni.

Hondúras komst óvænt yfir snemma í leiknum með frábæru marki en urðu svo fyrir áfalli á 33.mínútu þegar einn leikmaður liðsins var rekinn af velli. Brasilíu mönnum tókst svo að jafna metin skömmu fyrir hálfleik með marki Leandro Damiao og staðan jöfn að honum loknum.

Hondúras náði svo aftur forystunni í byrjun síðari hálfleiksins en Brasilíu menn svöruðu því með tveimur mörkum frá Neymar og Damiao og sigur liðsins því staðreynd.

Leikur Breta og Suður-Kóreu var spennandi allt frá upphafi til enda en Suður-Kórea komst yfir snemma í leiknum. Aaron Ramsey, leikmaður Arsenal, jafnaði svo metin úr vítaspyrnu og brenndi svo stuttu síðar af annari vítaspyrnu.

Hvorugu liðinu tókst að skora og þurfti því að grípa til vítaspyrnukeppni. Suður-Kórea nýtti allar sínar spyrnur en Daniel Sturridge, leikmaður Chelsea og Bretlands brenndi af sinni síðustu og sigur Suður-Kóreu því staðreynd.

Brasilía og Suður-Kórea munu mætast í undanúrslitum keppninnar á þriðjudag.