Mladic segist enga glæpi hafa framið

Sækjandi við stríðsglæpadómstól í Haag segir að Ratko Mladic herforingi og sveitir hans hafi verið orðnar vel þjálfaðar í morðum þegar kom að fjöldamorðunum í Srebrenica sumarið 1995. Aðalmeðferð í réttarhöldum hans er hafin.

„Ég tók ekki þátt í neinum glæpum. Ég hef aðeins varið þjóð mína," sagði Ratko Mladic, fyrrverandi yfirmaður herliðs Bosníu-Serba, sem nú situr á sakamannabekk Alþjóðasakadómstólsins í Haag.

Hann er sakaður um margvíslega stríðsglæpi og glæpi gegn mannkyni í tengslum við Bosníustríðið, sem geisaði á árunum 1992-95.

Aðalmeðferð í málinu hófst með málflutningi saksóknara í gær, tæpu ári eftir að Mladic var handtekinn í fjallaþorpi í norðanverðri Serbíu. Hann hafði þá verið í felum fyrir réttvísinni í fimmtán ár.

Saksóknarinn Dermot Groome sagði aðild Mladic að stríðsglæpum gegn Bosníu-mönnum hafa byrjað í maí árið 1992, fyrir nánast nákvæmlega tveimur áratugum, þegar hann varð yfirmaður herráðs Serba.

Rúmum þremur árum síðar, þegar fjöldamorðin voru framin í Srebrenica, segir Groome að Mladic og hersveitir hans hafa verið orðna „vel æfða í þeirri iðn að fremja morð". Um átta þúsund manns, mest karlar og drengir, voru myrtir í Srebrenica sumarið 1995 í verstu fjöldamorðum Evrópu frá lokum seinni heimsstyrjaldar.

Ákærurnar á hendur Mladic eru í ellefu liðum, þar á meðal fyrir þjóðarmorð, ofsóknir, morð og nauðganir.

Mladic vísar ákærunum á bug en hefur formlega hvorki viljað lýsa sig sekan né saklausan.

Saksóknarinn ætlar að leiða meira en 400 vitni fyrir dómstólinn og hefst vitnaleiðslan í lok maí. Groome segir að í málflutningi sækjenda verði orð Mladic óspart notuð gegn honum sjálfum, og tínd til ummæli hans bæði úr dagbókum og úr útvarps- og sjónvarpsviðtölum.

Við dómstólinn standa einnig yfir réttarhöld yfir Radovan Karadzic, fyrrverandi forseta lýðveldis Bosníu-Serba, sem var handtekinn í Belgrad, höfuðborg Serbíu, sumarið 2008. Aðalmeðferð í máli hans hófst í október 2009 en vitnaleiðslum saksóknara lauk nú í byrjun maí. Reiknað er með að málsvörn Karadzic hefjist um miðjan október.

Karadzic er, eins og Mladic, sakaður um margvíslega stríðsglæpi í tengslum við Bosníustríðið.

Félagi þeirra og leiðtogi, Slobodan Milosevic, fyrrverandi forseti bæði Serbíu og Júgóslavíu, lést hins vegar í fangelsi Alþjóðasakadómstólsins í Haag árið 2006, meðan réttarhöldunum yfir honum vegna sambærilegra glæpa var enn ólokið.gudsteinn@frettabladid.is