Fyrsta heimsóknin í heila öld

Elísabet Bretadrottning lét sprengjuhótanir ekki stöðva sig í að heimsækja Írland í gær. Tilgangurinn er að styrkja tengsl Írlands og Bretlands og fagna góðum árangri friðarsamninga á Norður-Írlandi.

Bretadrottning ætlar að vera á Írlandi þangað til á föstudag eða samtals í fjóra daga. Hún byrjaði á að heimsækja Mary McAleese, forseta Írlands, og saman hittu þær Enda Kenny forsætisráðherra.

McAleese hefur í fjórtán ár reynt að fá því framgengt að Bretadrottning kæmi í heimsókn til Írlands. Hún fagnaði því Elísabetu innilega og sagði að bæði löndin væru staðráðin í að bæta heiminn í framtíðinni.

Þetta er í fyrsta sinn síðan 1911 sem breskur þjóðhöfðingi kemur til Írlands, og þar með í fyrsta sinn frá því að Írska lýðveldið var stofnað árið 1921.

Hundrað ár eru sem sagt liðin frá því að Georg V., þáverandi Bretlandskonungur og afi Elísabetar, kom í heimsókn til Írlands.- gb