Heinze er á förum frá Marseille

Argentínski varnarmaðurinn Gabriel Heinze er á förum frá franska liðinu Marseille og ætlar að finna sér nýtt félag í sumar. Heinze, sem er fyrrum leikmaður Manchester United er að klára sitt annað tímabil hjá Marseille eftir að hafa komið þangað frá Real Madrid sumarið 2009. Hann ætlar ekki að spila áfram í Frakklandi.

Gabriel Heinze varð tvöfaldur meistari á sínu fyrsta ári með Marseille en liðið endar væntanlega í öðru sæti í frönsku deildinni á þessum tímabil. Lokaumferðin og síðasti leikur Heinze með Marseille verður á móti Caen á sunnudaginn.

Gabriel Heinze er 33 ára gamall argentínskur landsliðsmaður en hann hefur orðið meistari í Englandi (Manchester United 2006–07), á Spáni (Real Madrid 2007–08) og í Frakklandi (Marseille 2009–10). Heinze hefur spilað í Evrópu síðan að hann kom til spænska liðsins Valladolid 1997 þá 19 ára gamall.