Hvað kostar að þrífa glerhjúpinn á Hörpu?

Mörður Árnason, þingmaður Samfylkingarinnar, vill fá að vita hver er áætlaður árlegur kostnaður við þrif á glerhjúpnum sem umlykur tónlistar- og ráðstefnuhúsið Hörpu.

Mörður hefur sömuleiðis óskað eftir skriflegu svari frá mennta- og menningarmálaráðherra um ástæðu þess að átta félög koma að byggingu tónlistarhússins. „Af hverju nægir ekki eitt félag?" spyr Mörður.

Þau félög sem um ræðir eru Austurhöfn-TR, Portus, Ago, Situs, Totus, Hospes, Custos og Hringur.

Mörður vill líka fá að vita hverjir sátu í stjórnum þessara félaga árin 2009 og 2010, og hvað þeir fengu í þóknum fyrir stjórnarsetu þessi ár, alls, hver og einn, og samtals í hverju félagi fyrir sig.

Þetta er meðal þess sem kemur fram í fyrirspurn sem Mörður lagði fram á Alþingi í gær og óskar skriflegs svars við.

Fyrirspurnin er í fjórtán liðum, en í heild sinni er hún svohljóðandi:

1. Hvert er starfssvið félaga sem heita Austurhöfn-TR, Portus, Ago, Situs, Totus, Hospes, Custos og Hringur? Hverjir eru eigendur þeirra? Hver er fjöldi starfsmanna hjá hverju þessara félaga og hver var velta félaganna árin 2009 og 2010? Af hverju nægir ekki eitt félag?
   
   
2. Hverjir sátu í stjórnum fyrrgreindra félaga árin 2009 og 2010? Hvað fengu þeir í þóknun fyrir stjórnarsetu þessi ár, alls, hver og einn, og samtals í hverju félagi fyrir sig?
   
   
3. Hver er nú opinber kostnaðaráætlun Hörpu fullbyggðrar? Hver var upphafleg kostnaðaráætlun?
   
   
4. Hvernig er Hörpuframkvæmdin fjármögnuð? Hvaða lán hafa fyrrnefnd félög, Reykjavíkurborg og ríkissjóður tekið vegna byggingarinnar, og með hvaða kjörum?
   
   
5. Hver er áætlaður styrkur ríkis og borgar til framkvæmdarinnar? Hvað verður hann reiddur fram á mörgum árum?
   
   
6. Hver er viðbótarkostnaður vegna breytinga árið 2010 á fyrri hönnun innanhúss (Ago)?
   
   
7. Hver er lóðarkostnaður, framkvæmdakostnaður í umhverfi hússins, kostnaður við gatnagerð og kostnaður við bílahús?
   
   
8. Hver er heildarkostnaður við glerhjúpinn og undirstöður hans? Hver er þar af hönnunar- og verkfræðikostnaður við hjúpinn?
   
   
9. Hver ber kostnað við tjón á suðurhluta hjúpsins? Hvernig skiptist hann milli aðila?
   
   
10. Hver er áætlaður kostnaður við árleg þrif á glerhjúpnum (saltstorka, ryk og önnur óhreinindi)?
    
    
11. Hver annast kostnaðareftirlit með Hörpuframkvæmdinni? Liggja fyrir upplýsingar þaðan um einstaka verkþætti?
    
    
12. Hvað hafa margir starfsmenn unnið að Hörpu (í mannárum) og hvernig skiptast störfin milli starfsmanna á Íslandi og starfsmanna erlendis eða aðkominna?
    
    
13. Hvar liggja frammi teikningar að Hörpu (aðal- og séruppdrættir)? Af hverju hafa ekki allir uppdrættir legið frammi hjá byggingarfulltrúanum í Reykjavík?
    
    
14. Hver eru fyrirhuguð verklok við hvern verkþátt framkvæmdarinnar? Hvernig hafa upphafsáætlanir um framkvæmdahraða staðist?