Guðlaugur Victor lék í sigri Hibernian

Guðlaugur Victor Pálsson lék allan leikinn þegar Hibernian sigraði Inverness Caledonian Thistle 1-0 á útivelli í annarri umferð skosku úrvalsdeildarinnar sem hófst í dag.

Garry O´Connor skoraði sigurmark Hibs þegar tvær mínútur voru komnar fram yfir venjulegan leiktíma en Guðlaugur Victor stóð fyrir sínu og nældi sér í gult spjald á 69. mínútu leiksins.

Önnur úrslit dagsins í skosku úrvalsdeildinni voru þau að Rangers sigraði St. Johnstone á útivelli 2-0, með mörkum Steven John Naismith og Nikica Jelavic, Kilmarnock og Motherwell gerðu markalaust jafntefli og St. Mirren lagði Aberdeen á heimavelli 1-0 með marki Nigel Hasselbaink.