Hvatti Sigurjón til að senda lagið inn

„Ég hafði alltaf trú á þessu lagi, alveg frá því að Sigurjón tók það upp. En svo er þessi keppni svo hverful að maður veit aldrei. Keppendurnir í ár voru náttúrlega frábærir, keppnin því mjög tvísýn og eiginlega ekkert öruggt,“ segir Þórunn Erna Clausen.

Lagið Aftur heim eftir eiginmann hennar, Sigurjón heitinn Brink, sigraði Söngvakeppni Sjónvarpsins á laugardaginn. Það voru vinir Sigurjóns; Hreimur Örn, Vignir Snær, Pálmi Sigurhjartarson, Matthías Matthíasson og Benedikt Brynleifsson sem fluttu lagið í beinni útsendingu sjónvarpsins. Sigur lagsins var nokkuð öruggur því samkvæmt atkvæðatölum frá RÚV fékk Aftur heim rúmlega 25 þúsund atkvæði. Ég trúi á betra líf eftir Hallgrím Óskarsson, sem hafnaði í öðru sæti, fékk rúmlega átján þúsund en alls bárust 96 þúsund atkvæði.

Þórunn viðurkennir að henni hafi alltaf þótt lagið skemmtilegt og grípandi og hún hafi hvatt Sigurjón til að senda það inní keppnina á sínum tíma. Hann hafi síðan ekki tekið annað í mál en að hún semdi textann við það.

Þórunn kveðst strax hafa orðið yfir sig hrifinn af laginu hans Sjonna.

„Það er svo ólíkt þessum hefðbundnu Eurovision-lögum, það fylgir ekki neinum formúlum,“ segir Þórunn en margir hafa bent á að lagið sé nokkuð í anda dönsku laganna sem hafa náð langt í þessari keppni, laga á borð við Fly on the Wings of Love og I‘ll never ever let you go. Þórunn viðurkennir að síðarnefnda lagið hafi verið eitt fyrsta lagið sem hún og Sjonni æfðu saman og þau sungu óteljandi oft. Að sögn Þórunnar stendur til að þýða textann yfir á ensku og er sú vinna þegar hafin.

Þórunn sá um að stýra atriðinu á laugardagskvöldinu, rétt eins og þegar Sigurjón keppti með lagið Waterslide. Og hún mun einnig sitja í leikstjórastólnum í Þýskalandi þegar atriðið keppir í Dusseldorf í sjálfri Eurovision

freyrgigja@frettabladid.is