Áfrýjun Íslandsbanka kemur lögmanni verulega á óvart

Lögmaður stofnfjáreigenda í Byr sem fengu lán hjá Glitni til þess að auka við stofnfjáreign sína segir ljóst að fólk hafi verið blekkt og beinlínis leitt til slátrunar. Lögmaðurinn, Hróbjartur Jónatansson, segir það koma sér verulega á óvart að bankinn ætli að áfrýja fjórum dómum sem féllu í Héraðsdómi og vonar að bankinn endurskoði afstöðu sína.

Málið snýst um fjóra dóma sem féllu í Héraðsómi í vikunni en Íslandsbanki tapaði þremur málanna en vann eitt. Í gær ákvað bankinn síðan að áfrýja öllum málunum til Hæstaréttar.

Auk stofnfjáreigenda í Byr er einnig um að ræða stofnfjáreigendur í Sparisjóði Norðlendinga, og eru þetta rúmlega 400 manns í heildina.

Hróbjartur er lögmaður hóps 50-60 storfnfjáreigenda í Byr og var með eitt málanna. Hann segir það koma sér verulega á óvart að bankinn hafi ákveðið áfrýja svo fljótt og greinilegt að menn hafi ekki gaumgæft þessa dóma neitt sérstaklega mikið, menn eigi þó auðvitað rétt á því að endurskoða niðurstöðu héraðsdóms.

Það kemur honum hinsvegar verulega á óvart að bankinn skuli ákveða að gera það í þessu tilfelli. Hróbjartur segir það liggja fyrir að fólk hafi í raun verið leitt til slátrunar og að bankinn hafi beitt blekkingum. Ef bankinn vinni málið þá gerist það á lagatæknilegum forsendum. Lögmaðurinn segist hafa talið að nýr hugsunarháttur hafi verið innleiddur hér á landi eftir hrun en að svo viðist ekki vera hjá Íslandsbanka. Hann bætir því við að það komi þó ekki á óvart enda sé mestmegnis um sömu yfirstjórn að ræða hjá Íslandsbanka og stjórnaði Glitni á sínum tíma.

Samkvæmt heimildum fréttastofu eru ástæður þess að bankinn ákvað að áfrýja málunum aðallega þær að um prófmál sé að ræða sem mikilvægt sé að fá niðurstöðu í. Dómarar hafi ekki verið samhljóða og þar að auki gætu dómarnir haf fordæmisgildi fyrir aðra stofnfjáreigendur.