Þingmaður vill rannsókn - segir líf Önnu í hættu

Bandarískur þingmaður krefst þess að rannsókn fari fram á því hvernig stóð á því að nafn Önnu Björnsdóttur sem sagði til glæpaforingjans James "Whitey" Bulgers var gert opinbert. Hann segir líf hennar augljóslega í hættu.

Alríkislögreglan bandaríska hefur neitað að tjá sig nokkuð um það hvort þeir hafi gefið leyfi fyrir því nafn Önnu yrði gert opinbert en greint var frá nafni hennar í blaðinu Boston Globe í vikunni. Dan Burton, þingmaður Repúblikana og nefndarmaður í eftirlitsnefnd með opinberum stofnunum krefst þess í samtali við Boston Herald í dag að sá alríkislögreglumaður sem beri ábyrgð lekanum verði látinn taka pokann sinn sem fyrst.

Burton segist hafa mikla samúð með Önnu sem þurfi nú að hafa varan á sér um ókomna tíð. Hann segist viss um að Bulger, sem sakaður er um nítján morð, eigi enn vini í undirheimunum og hann staðhæfir að Anna sé í hættu. Annar þingmaður, Stephen Lynch, sem er frá Boston eins og glæpaforinginn, tekur í svipaðan streng og krefst þess að rannsakað verði hvernig nafn hennar lak út. Hann bendir á hið slæma fordæmi sem geti skapast og að hér eftir verði mun erfiðara að fá fólk til þess að segja til glæpamanna þar sem óvíst sé hvort það verði undir nafnleynd.

Þótt alríkislögreglan hafi ekkert viljað tjá sig um málið segir talsmaður Carmenar Ortiz, saksóknarans sem fer með mál Bulgers, að bæði saksóknaraembættið og alríkislögreglan hafi tekið skýrt fram frá upphafi málsins að þeir vildu að nafn uppljóstrarans yrði ekki gefið út.

Þetta stangast nokkuð á við orð Shelley Murphy, blaðakonu Boston Globe. Hún sagðist í samtali við fréttastofu í gær hafa haft samband við við alríkislögregluna og saksóknarann og fengið þær upplýsingar að ekki væri talið að Anna væri í hættu. Því hafi blaðið ákveðið að birta nafn hennar.