Skoða allt sem bætt gæti fjárhag hjá OR

Til greina kemur að Orkuveita Reykjavíkur (OR) selji frá sér starfsemi Gagnaveitu Reykjavíkur. Gagnaveitan á og rekur ljósleiðaranet, en skilið var á milli reksturs OR og Gagnaveitunnar eftir ákvörðun Póst- og fjarskiptastofnunar árið 2006. Gagnaveitan er að fullu í eigu Orkuveitunnar.

„Samkvæmt gildandi stefnu, sem fyrri stjórn samþykkti árið 2009 að ég tel, þá er rekstur Gagnaveitunnar talinn til kjarnastarfsemi Orkuveitunnar. Ég hef hins vegar verið talsmaður þess að skoða þetta frá öllum hliðum,“ segir Haraldur Flosi Tryggvason, formaður stjórnar OR. Hann kveðst telja að „infrastrúktúr“ félags á borð við Gagnaveituna gæti verið áhugaverð eign á markaði.

Mögulega sölu Gagnaveitunnar segir Haraldur hafa verið rædda um nokkurt skeið, en hann fagnar tillögu þar að lútandi sem Kjartan Magnússon, borgarfulltrúi Sjálfstæðisflokks og stjórnarmaður í Orkuveitunni, lagði fram á stjórnarfundi Orkuveitunnar 18. þessa mánaðar. „Tímans vegna var umfjöllun um þetta mál frestað,“ segir Haraldur, en áréttar um leið að verið sé að skoða alla eignastöðu hjá Orkuveitunni. Hugmyndin segir hann fá umræðu og afgreiðslu þegar fram í sæki. Hins vegar sé það ekki svo að kaupanda að Gagnaveitunni sé að finna „rétt handan við hornið“, ferlið sé flókið og tímafrekt. Þannig sé til dæmis mikilvægt að skoða hvernig eignahaldi á svona fyrirtæki sé best háttað. „En allt sem horfir til framfara í fjárhag Orkuveitunnar á að skoða.“

Í tillögu Kjartans Magnússonar er kveðið á um að gert verði verðmat á Gagnaveitu Reykjavíkur og hlutur Orkuveitunnar seldur fáist viðunandi tilboð. „Skoðaðar verði mismunandi leiðir til að stuðla að því að OR fái sem mest fyrir hlut sinn í slíku söluferli, til dæmis með beinni sölu eða hugsanlegri sameiningu við önnur fyrirtæki. Einnig má skoða hvort rétt sé að selja umræddan hlut í áföngum,“ segir þar.

Kjartan segir tillögu um sölu Gagnaveitunnar síðast hafa komið fram sumarið 2007, en illu heilli verið tekna af dagskrá. Nú sé staða Orkuveitunnar hins vegar slík að æskilegt sé að hún selji eignir sem ekki heyri til hefðbundinni starfsemi.

olikr@frettabladid.is