Erlend matargerð bönnuð í írönsku sjónvarpi

Íranska útvarpsráðið hefur ákveðið að banna eina ákveðna tegund af sjónvarpsþáttum, nefnilega matreiðsluþætti sem kenna landsmönnum að elda mat frá öðrum löndum.

Þetta er haft eftir yfirmanni útvarpsmála þar í landi og segja fréttaskýrendur að bannið sé liður í tilraunum þarlendra yfirvalda til að efla þjóðerniskennd á meðal landsmanna. Pizzur, pastaréttir og vestrænir réttir á borð við hamborgara og pylsur eru vinsælir í Íran og ráðamönnum þykir greinilega nóg um.

Því hefur kollegum Jóa Fel og Rikku þar í landi verið harðbannað að bjóða upp á erlenda matargerð í þáttum sínum.