Forgangsatriði að draga úr brottfalli

Mikið brottfall íslenskra framhaldsskólanema var til umræðu í vinnustofu sem mennta- og menningarmálaráðuneytið stóð fyrir á Grand Hóteli í gær. Tók sendinefnd frá Efnahags- og framfarastofnun Evrópu (OECD) þátt í vinnustofunni en fyrir þátttakendur var lagt minnisblað sem stofnunin hefur unnið í samvinnu við ráðuneytið um styrkleika og veikleika íslensks framhaldsskólanáms.

„Það má segja að þessi málstofa marki upphafið að vinnu við að draga úr þessu vandamáli. Við ætlum að reyna að læra af öðrum þjóðum og búa til aðgerðaáætlun sem miðar að því að draga úr brottfalli,“ segir Katrín Jakobsdóttir, mennta- og menningarmálaráðherra, og bætir við: „Þetta er forgangsverkefni en við erum að horfa á það út frá þeim markmiðum sem við settum í sóknaráætluninni Ísland 2020 um að hækka hlutfall þeirra sem ljúka framhaldsskólanámi.“

Í minnisblaðinu kemur fram að einungis 45 prósent íslenskra framhaldsskólanema klára námið á fjórum árum. Meðaltalið meðal ríkja OECD er hins vegar 68 prósent í sambærilegu námi. Þá kemur fram í minnisblaðinu að stefnumótun sem miðar að minna brottfalli geti aukið hagvöxt og velferð. Þá tryggi útskrift úr framhaldsskóla að einstaklingur hafi lágmarkskunnáttu sem krafist er á vinnumarkaði og geti nálgast frekari menntun kjósi hann svo.

Katrín segir mikilvægt að horfa á vandamálið út frá heildarsýn á menntakerfið. Ekki megi staðnæmast við eitt skólastig þar sem þau hafi áhrif hvert á annað. Því verði efnt til víðtæks samráðs við vinnuna fram undan. Loks segir hún brottfall að vissu leyti villandi orð um hinn raunverulega vanda. „Þetta snýst í rauninni um það að sem flestir finni menntun við hæfi og að við beinum ekki endilega öllum á sömu braut. Að fólk fái tækifæri til að fullnýta hæfileika sína og taka virkan þátt í samfélaginu,“ segir Katrín.

Í minnisblaðinu segir að ýmislegt bendi til þess að það sé ekki skortur á námsáhuga meðal íslenskra nemenda sem valdi miklu brottfalli. Heldur eigi að líta til uppbyggingar framhaldsskólanáms, gæða kennslu og samspils vinnumarkaðar og náms.

Meðal skýringa sem nefndar eru til sögunnar á vandanum má nefna að margir nemendur finni ekki nám við sitt hæfi og er sérstaklega bent á skort á möguleikum á verklegu námi og starfsnámi. Þá séu hvatar til staðar á vinnumarkaði fyrir ungt fólk að fara snemma út á vinnumarkað í stað þess að klára framhaldsskólanám.magnusl@frettabladid.is