Dagbókarbrot Páls Óskars: Bjöggi Halldórs í Síerra Leóne!

Dagbókarbrot frá Páli Óskari Hjálmtýssyni í Síerra Leóne munu birtast næstu daga á Vísi, eitt á dag, fram að söfnunar- og skemmtiþætti UNICEF, Barnahjálp Sameinuðu þjóðanna, sem sýndur verður á föstudag, á degi rauða nefsins. Dagur rauða nefsins verður í opinni útsendingu á Stöð 2 og hér á Vísi.



Hér er ég staddur á heilsugæslustöð í Síerra Leóne, í vesturhluta Afríku, nálægt þorpi sem er skírt í höfuðið á Bjögga Halldórs. Þorpið heitir BO. Ég er ekki að djóka.

Ég varð að láta taka mynd af mér með þessari konu. Hún er ljósmóðir sem ætti að vera fyrir löngu hætt störfum og komin á eftirlaun. En hún getur ekki hætt störfum þar sem kunnátta hennar og þekking er ómetanleg. Í Síerra Leóne búa 5,6 milljónir manna. Þar starfa 56 læknar. Það gerir einn lækni á hverja 100.000 íbúa. Restin af fólkinu sem starfar við heilsugæslu í landinu er langt frá því að vera fagfólk.

Ef þið skoðið myndina vel þá sjáið þið að við erum stödd á FÆÐINGARDEILDINNI. Inni í þessu herbergi hefur þessi kona hjálpað ótal mörgum mæðrum að fæða börn sín. Þótt aðstæðurnar séu vægast sagt fábrotnar, þá fer hér fram gríðarlega yfirgripsmikil starfsemi. Hér fæðast börnin, þau eru vigtuð, mæld, nærð, bólusett og síðast en ekki síst – skrásett. Börn sem ekki eru skrásett týnast auðveldlega í kerfinu.

UNICEF er á fullu við að hjálpa börnum á heilsugæslustöðvum sem þessari. UNICEF skaffar m.a. bóluefni við mörgum lífshættulegum sjúkdómum sem börn gætu annars dáið úr.

Ég veit að þú getur ekki verið á staðnum sjálf(ur) til að hjálpa þessu fólki. En hjálp þín getur borist til þeirra í formi reglulegs framlags. Gerumst heimsforeldrar núna. Þú getur græjað það á unicef.is.

- Páll Óskar