Umarov segist bera ábyrgð á sprengjuárásinni í Moskvu

Eftirlýstasti hryðjuverkamaður Rússlands, tjéténinn Doku Umarov, hefur lýst ábyrgðinni á sprengjuárásinni á Demo-ded-ovo flugvellinum í Moskvu á hendur sér. Árásin var framin þann 24 janúar síðastliðinn og létust 36 og 180 særðust.

Í myndbandi sem Umarov hefur sett á Netið segir hann að árásin hafi verið viðbrögð við stríðsglæpum Rússa í Kákasushéruðunum. Svipaðar árásir munu fylgja í kjölfarið segir hann. Umarov er einn af fáum Tjéténskum uppreisnarleiðtogum sem enn eru starfandi og hann hefur einnig lýst ábyrgð sinni á sprengjuárás um borð í lest árið 2009 þegar 26 létust.