Bandaríkjamenn í viðræðum um að Mubarak hætti strax

Stórblaðið New York Times hefur það eftir heimildum að bandarískir ráðmenn eigi nú í viðræðum við háttsetta egypska embættismenn um að Mubarak láti strax af störfum og að við taki bráðabirgðastjórn undir forystu Omar Suleiman varaforseta landsins.

Hosni Mubarak forseti Egyptalands segir að hann vilji hætta sem fyrst. Þetta kom fram í fyrsta viðtalinu sem Mubarak veitir eftir að mótmælin hófust í landinu. Í viðtali við ABC sjónvarpsstöðina segir Mubarak að hann sé orðinn dauðþreyttur á forsetaembættinu. Hinsvegar myndi það bjóða hættunni heim ef hann léti strax af störfum.