Aðalsalur Hörpunnar heitir Eldborg

Sölum tónlistarhússins Hörpu hafa nú verið gefin formleg nöfn. Stærsti salurinn heitir Eldborg. Í tilkynningu frá Steinunni Birnu Ragnarsdóttur, tónlistarstjóra Hörpunnar, segir að nöfnin í húsinu séu úr tónlistarsögunni auk nafna úr menningu og náttúru landsins.

„Nöfnin fjögur eru talin ríma vel við ólíka hönnun og liti salanna. Það má enn fremur segja að þessi nöfn vísi til frumkraftanna fjögurra: elds, lofts, jarðar og vatns, en í austurlenskum fræðum er það talið skapa góðan anda og jafnvægi í húsakynnum ef öll þessi efni eru til staðar.

Stærsti salurinn, sjálfur tónleikasalurinn, hefur fengið nafnið Eldborg. Hinn tónleikasalurinn mun heita Norðurljós. Ráðstefnusalurinn heitir Silfurberg og fjórði salurinn, sem er þeirra minnstur, fær nafnið Kaldalón,“ segir í tilkynningu Steinunnar.

Þá hafa önnur salarkynni og fundarherbergi Hörpunnar einnig fengið nöfn. Þau eru miðuð við mót lands og vatns og verða kölluð Nes, Vör, Vík og Sund.

Tvö sýningarsvæði í ytri rýmum Hörpunnar munu heita Flói og Eyri. Skiptanleg ráðstefnuherbergi eru nefnd Ríma, Vísa og Stemma.

- gar