Bradley fær 4,8 milljónir á mánuði fyrir að þjálfa landslið Egypta

Bob Bradley skrifaði í dag undir þriggja ára samning um að taka við þjálfun landsliðs Egyptlands en hann mun stjórna landsliði Egypta fram yfir HM 2014 sem fer þá fram í Brasilíu.

Bradley var áður þjálfari bandaríska landsliðsins frá 2007 til 2011 en var rekinn í sumar eftir að Bandaríkjamenn töpuðu 2-4 á móti Mexíkó í úrslitaleik Gull-bikarsins sem er álfukeppnin í Norður- og Mið-Ameríku. Bradley hafði áður vakið athygli fyrir góða frammistöðu bandaríska landsliðsins undir hans stjórn.

Bradley fær 40 þúsund dollara í mánaðarlaun eða tæplega 4,8 milljónir íslenskra króna. Hann tekur við af Hassan Shehata sem hætti eftir slakan árangur Egypta í undankeppni Afríkukeppninnar.

Egyptar hafa unnið þrjár síðustu Afríkukeppnir en komust ekki upp úr undankeppninni fyrir næstu Afríkukeppni sem fer fram í Miðbaugs-Gíneu og Gabon á næsta ári.