Platini þarf að koma sjálfur fyrir dómara í Sion-málinu

Michel Platini, forseti UEFA, þarf að mæta í réttarsal í máli svissneska félagsins Sion gegn evrópska knattspyrnusambandinu en Svisslendingarnir eru afar ósáttir með að UEFA kastaði þeim út úr Evrópudeildinni á dögunum og höfðuðu mál.

Sion var ekki tilbúið að sætta sig við útskurð UEFA sem dæmdi Sion-liðið úr keppni vegna brota á félagsskiptabanni sambandsins. Sion hafði slegið út skoska félagið Celtic sem tók síðan sæti liðsins í Evrópudeildinni eftir dóm UEFA.

Michel Platini er kallaður fyrir dómarann til að útskýra þá ákvörðun UEFA að vísa Sion úr keppni. Annar háttsettur maður innan UEFA, framkvæmdastjórinn Gianni Infantino, er líka boðaður í réttarsalinn.

„Þeir þurfa að mæta sjálfir og geta ekki látið lögfræðingana sína sjá um þetta. Ef þeir mæta ekki mun lögreglan leita þá uppi og koma með þá í réttarsalinn," sagði Nicolas Pillet, talsmaður Sion, við AFP.

„UEFA hefur aðsetur í Sviss og þarf að virða svissnesk lög," sagði Pillet en Héraðsdómstóll hefur þegar dæmt Sion í hag í þessu undarlega máli.