Þingkonan er tvöfalt kraftaverk

Bandaríska þingkonan Gabrielle Giffords hefur opnað augun og er farin að anda sjálf. Ef stutt er við hana getur hún setið á rúmstokknum og dinglað fótunum. Hún getur einnig hreyft hendurnar. Giffords var skotin í höfuðið síðastliðinn laugardag þegar geðveikur maður myrti sex manns og særði fjórtán á kosningafundi hennar.

Læknar segja að enn sé hætta á ferðum og ekki hægt að segja til um hversu miklum bata þingkonan nær. Það verði þó að viðurkennast að það sé kraftaverk að hún skuli yfirleitt vera á lífi. Framfarirnar sem hún sýni séu annað kraftaverk.