John Arne Riise ætlar að ná Íslandsleiknum: Nuddar sig sjálfur

John Arne Riise er tæpur fyrir landsleik Noregs og Íslands í undankeppni EM sem fer fram á Ullevaal í Osló á föstudagskvöldið. Riise meiddist á nára í leik með Fulham á móti Dnipro í Evrópudeildinni í síðustu viku.

John Arne Riise ætlar að gera allt til þess að ná þessum leik en eitt af þrettán landsliðsmörkum hans kom einmitt á móti Íslandi haustið 2009. Riise tjáði sig um stöðu mála við norska Dagblaðið en það verður læknir norska liðsins sem tekur endanlega ákvörðun um hvort Riise geti spilað leikinn.

„Ég reyni alltaf að koma fyrr til baka úr meiðslum en læknarnir spá," sagði John Arne Riise sem er í endurhæfingu og meðferð frá morgni til kvölds.  

„Ég nudda sjálfan mig stundum til að flýta fyrir bata. Ég byrja endurhæfinguna snemma á morgnanna og er alltaf að gera eitthvað fram á kvöld. Ég ætla að reyna allt til að ná leiknum en það kemur endanlega ekki í ljóst fyrr en á föstudagsmorguninn hvort ég verði orðinn góður. Ég reyni alltaf að hugsa jákvætt og ég ætla að trúa því að ég sé að fara spila þennan leik þangað til annað kemur í ljós," sagði Riise.

„Það er pirrandi að vera kominn til móts við landsliðið en geta ekki tekið þátt. Ég verð samt að vera skynsamur og passa upp á að ég skemmi ekki meira. Ef ég er ekki nema 95 prósent klár þá hvíli ég mig frekar fyrir leikinn á þriðjudaginn," sagði Riise að lokum en Norðmenn eru í hörku keppni við Portúgal og Danmörku um sæti í úrslitakeppni EM 2012.