Innlent

Um 250 ofbeldismenn skulda fórnarlömbunum bætur

Sex konur og 241 karl eru ekki borgunarmenn fyrir bótum sem þau hafa verið dæmd til að greiða vegna ofbeldis. Málin eru 306, af því að sumir hafa ráðist á fleiri en eitt fórnarlamb.
Sex konur og 241 karl eru ekki borgunarmenn fyrir bótum sem þau hafa verið dæmd til að greiða vegna ofbeldis. Málin eru 306, af því að sumir hafa ráðist á fleiri en eitt fórnarlamb. Mynd/Stefán Karlsson
Ofbeldismenn sem ekki hafa greitt fórnarlömbum sínum bætur samkvæmt ákvörðun bótanefndar eru 247 talsins, sex konur og 241 karl, að því er Erna Jónmundsdóttir, deildarstjóri hjá innheimtumiðstöð sekta og sakarkostnaðar hjá Sýslumanninum á Blönduósi, greinir frá.

„Málin sem eru til innheimtu eru alls 306 og nemur heildarfjárhæðin 266.487.729 krónum með vöxtum og kostnaði. Innheimtumiðstöðin tók við innheimtunni vorið 2008 og fékk þá inn öll mál en þau voru áður innheimt af fjársýslu ríkisins og lögmönnum.“

Tveir ofbeldismannanna hafa verið dæmdir til að greiða bætur vegna sjö mála hvor, tveir vegna fimm mála hvor, tveir vegna fjögurra mála hvor, níu vegna þriggja mála hver og fimmtán vegna tveggja mála hver, að því er Erna greinir frá.

Ógreidd mál frá árinu 2008 eru 150, að því er fram kemur í upplýsingum frá Fjársýslu ríkisins. Frá 2009 eru 118 mál ógreidd, 23 frá 2010 og 15 það sem af er þessu ári.

„Menn hafa getað samið við Innheimtumiðstöðina um að fá að greiða sektirnar á löngum tíma og fá þá til dæmis að greiða 5.000 krónur á mánuði,“ segir Erna.

Um 130 til 160 milljónir króna eru greiddar úr ríkissjóði ár hvert til þolenda ofbeldisbrota. Frá 2006 hafa borist um 400 umsóknir á ári um bætur. Um 25 prósentum þeirra er hafnað.

Hámarksbætur sem ríkissjóður greiðir fyrir líkamstjón eru 2,5 milljónir króna en fyrir miska 600 þúsund krónur. Ef um kynferðisbrot er að ræða greiðir ríkið eingöngu miskabætur.

Innanríkisráðherra ákvað fyrr í þessum mánuði að láta skoða samsetningu bóta til fórnarlamba ofbeldismanna. „Tillögum að breytingum verður skilað innan skamms,“ segir Halldór Þormar Halldórsson, lögfræðingur hjá Sýslumanninum á Siglufirði, sem hefur umsjón með greiðslu bótanna.

- ibs



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.