Forseti Túrkmenistans fyrirskipar fegurðarsamkeppni hesta

Forseti Túrkmenistans hefur látið þau boð út ganga að á hverju ári héðan í frá verði haldin fegurðarsamkeppni í landinu, og skal þar ekki velja fegurstu konuna, heldur fallegasta hestinn.

Bestu hestarnir verða síðan valdir til þess að breiða út hróður Túrkmenska hestakynsins um allan heim.

Túrkmenar eru afar stoltir af hestunum sínum og í Túrkmenistan er stranglega bannað að leggja hrossakjöt sér til munns, ólíkt því sem tíðkast hjá nágrannaþjóðum þeirra.

Forsetinn, sem heitir því þjála nafni Gurbanguly Mälikgulyýewiç Berdimuhamedow er mikill hestamaður en túrkmenskir hestar hafa verið eftirsóttir allt frá því Alexander mikli tók ástfóstri við þá.

Fyrirrennari Gurbanguly á forsetastóli, Saparmurat Niyazov, oft kallaður faðir Túrkmena, var sama sinnis og það vakti athygli árið 2004 þegar hann lét byggja 20 milljón dollara afþreyingarmiðstöð, með sundlaug, loftræstingu og fullkominni læknaaðstöðu, fyrir hesta.