Bæta stolna skartgripi eingöngu að litlu leyti

Tvær konur í Kópavogi, sem urðu nýlega fyrir barðinu á bíræfnum skartgripaþjófum, fá ekki nema fimm prósent af tryggingafjárhæð á innbúi og persónulegum munum endurgreidd frá tryggingafélaginu. Þær voru tryggðar hjá VÍS. Þjófarnir höfðu á brott með sér mikið af dýrum skartgripum úr gulli og hvítagulli með eðalsteinum.

Innbrotafaraldur er nú í gangi, eins og Fréttablaðið greindi frá í gær. Um tuttugu innbrot hafa verið framin á höfuðborgarsvæðinu. Þau eiga það sammerkt að einungis var farið inn í sérbýli, helst inn um svefnherbergisglugga eða dyr á bakhliðum húsa í útjaðri byggðar og dýrum skartgripum stolið.

Konurnar tvær sem Fréttablaðið ræddi við í gær báðust undan því að koma fram undir nafni undir þessum erfiðu kringumstæðum. Þær voru sammála um að þjófarnir væru þrautþjálfaðir í sínu „fagi". Báðar kváðust þær ætla að herða öryggisgæslu heima hjá sér eftir föngum eftir þessa dapurlegu reynslu.

Önnur kvennanna var með stórt skartgripaskrín í fataherbergi undir stafla af fötum. Þjófarnir tæmdu það, að nokkrum silfurskartgripum og semelíusteinum undanskildum, og settu það síðan aftur á sinn stað. Konan, sem er ekkja, átti meðal annars mikið af sérsmíðuðum skartgripum sem maðurinn hennar hafði gefið henni og þeim stálu þjófarnir, auk giftingarhringa þeirra beggja. Að auki voru dýrmætir ættargripir teknir.

Konan er með átta milljóna króna innbústryggingu en hefur verið tjáð að hún fái að hámarki fimm prósent af henni eða 400 þúsund krónur.

„Ég reyni bara að gleðjast yfir því að hvorki börn mín né aðrir sem ég þekki stunda óheiðarlega iðju, heldur er gott og heilbrigt fólk í kringum mig," segir hún. Hin konan og tvær dætur hennar misstu skartgripi sína, auk tveggja nýlegra tölva, sem hún hafði nýverið skannað allar sínar fjölskyldumyndir inn á. Hún segir þjófana hafa valið vendilega dýra skartgripi, en skilið hina ódýrari eftir.

Hildur Arna Hjartardóttir, vörustjóri hjá VÍS, segir að F plús trygging á innbúi og persónulegum munum nái ekki yfir úr og skartgripi nema að hluta. Um sé að ræða tiltekið ákvæði í skilmálum þar sem segi að úr og skartgripir fáist bætt að hámarki með fimm prósentum af vátryggingafjárhæðinni. Fólki sé bent á að taka sérstakar tryggingar fyrir skartgripum.

jss@frettabladid.is