Málum sérstaks saksóknara fjölgar enn

Níu mál komu inn á borð sérstaks saksóknara í síðustu viku. Heildarfjöldi mála er þar með orðinn 119 en þar af teljast 89 virk. Talan mun að öllum líkindum halda áfram að hækka á næstu misserum en tugir mála eru til skoðunar hjá Fjármálaeftirlitinu.

Þetta var meðal þess sem kom fram á fundi embættis ríkissaksóknara og Ákærendafélagsins í fyrirlestrasal Þjóðminjasafnsins í gær. Rætt var um stöðu embættis sérstaks saksóknara og framtíð efnahagsbrotarannsókna á Íslandi.

Ólafur Þór Hauksson, sérstakur saksóknari, og Helgi Magnús Gunnarsson sem er varasaksóknari Alþingis í ótímabundnu leyfi frá starfi saksóknara efnahagsbrota, tóku til máls á fundinum.

Í erindi sínu fór Ólafur yfir gang mála hjá embættinu frá því það var sett á laggirnar í lok árs 2008. Í upphafi störfuðu þar fimm einstaklingar en þeim hefur fjölgað í 72. Í málunum 119 sem embættið hefur rannsakað koma fyrir 100 ólíkir sakborningar en nokkur fjöldi þeirra kemur við sögu í fleira en einu máli.

Ólafur sagði flest málin varða verulega fjárhagslega hagsmuni og yfirleitt hafi margir komið að þeim gjörningum sem til skoðunar séu. Þá telji innlendir sem erlendir sérfræðingar málin stór og flókin á alla mælikvarða. „Til marks um það má nefna nýlega aðgerð sem Serious Fraud Office (SFO) í Bretlandi stóð fyrir í samvinnu við okkur. Þar tóku þátt 135 löreglumenn og starfsmenn SFO. Þetta telst langstærsta aðgerð sem SFO hefur staðið fyrir,“ sagði Ólafur.

Sérstakur saksóknari hefur hingað til gefið út tvær ákærur en að sögn Ólafs bíða stóru málin enn. Áætlanir gera ráð fyrir að flestum málum verði lokið eða þau komin vel á veg árið 2014.

Komið hefur fram að sameina á embætti sérstaks saksóknara og efnahagsbrotadeild ríkislögreglustjóra í haust. Ólafur og Helgi ræddu fyrirhugaða sameiningu einnig á fundinum sem þeir telja skynsamlega.

magnusl@frettabladid.is