Skjárinn sniðgengur Edduna

Ein stærsta sjónvarpsstöð landsins, Skjár einn, hyggst sniðganga Eddu-verðlaunin og halda eigið hóf á skemmtistaðnum Esju við Austurstræti en verðlaunaafhendingin verður í beinni útsendingu á Stöð 2 og hér á Vísi.

Hera Ólafsdóttir, framkvæmdastjóri Eddunnar, vildi ekkert tjá sig um meinta fýlu Skjásins og sagði ekkert samhengi milli hennar og hverjir afhentu verðlaun.

Athygli vekur að helstu fulltrúar Skjásins afhenda Edduna í fagflokkum en sú afhending er tekin upp hálftíma fyrir eiginlega útsendingu. Hrefna Sætran og Gunnar Helgason verða því einu fulltrúar Skjásins í beinu útsendingunni.

Forseti Íslands, Ólafur Ragnar Grímsson, mun afhenda heiðursverðlaun Eddunnar í kvöld en Katrín Júlíusdóttir iðnaðarráðherra afhendir Edduna fyrir kvikmynd ársins.

Vaktar-pör eru nokkuð áberandi í því að afhenda verðlaun en þau Pétur Jóhann Sigfússon og Sara Dögg Ásgeirsdóttir tilkynna hver hlýtur Edduna fyrir handrit ársins og borgarstjórinn í Reykjavík, Jón Gnarr, afhendir Edduna ásamt Ragnari Bragasyni fyrir leikið sjónvarpsefni ársins. - fgg