Vala Matt selur á Ás­valla­götunni

Íbúðin er á fyrstu hæð í fjórbýlishúsi við Ásvallagötu sem var byggt árið 1938. Í lýsingu á fasteignavef Vísis kemur fram að íbúðin hafi verið sérstaklega teiknuð og hönnuð af Völu sjálfri og endurnýjuð töluvert.

Gengið er upp tröppur frá hellulögðum palli fyrir framan húsið inn í íbúðina. Eldhúsið tekur þar við manni en þar er ný og sérhönnuð eldhúsinnrétting og eldhúseyja með kvartsteini. Inni í innréttingunni er uppþvottavél ásamt þvottavél með þurrkara. Borðstofan liggur við eldhúsið og nýtur birtu frá glugga.

Blöndunartækin í eldhúsinu gefa íbúðinni ákveðna sérstöðu og eru býsna athyglisverð. Þar er hægt að fá kalt sódavatn beint úr öðrum krananum og bullandi heitt vatn úr hinum.

Frá eldhúsinu er gengið inn í bjarta stofu með stórum gluggum. Einn veggurinn þar er þakinn speglum sem stækka rýmið. Baðherbergið liggur einnig frá eldhúsinu, það er flísalagt með svörtum Mustang-náttúrusteini og svo er svefnherbergi með töluverðu skápaplássi.

Í kjallara er lítil geymsla og stórt sameiginlegt rými sem áður var þvottahús en er nú notað fyrir frystikistur og skápa. Fyrir framan húsið er búið að leggja hellur og setja skrautmöl og skýli fyrir ruslatunnurnar. 

Hægt er að skoða fleiri myndir af íbúðinni á fasteignavef Vísis og hjá Fasteignasölunni Lind.