Sigurjón Brink jarðsunginn í dag

Tónlistarmaðurinn Sigurjón Brink verður jarðsunginn í Grafarvogskirkju klukkan þrjú í dag. Sigurjón, sem var 36 ára gamall, lést 17. janúar en banamein hans var heilablóðfall.

Heilsíðuauglýsing birtist í Fréttablaðinu í dag þar sem fram kom að sýningin Faust með Vesturporti fellur niður en stjúpsystir Sigurjóns er Nína Dögg Filippusdóttir leikkona og maður hennar er Gísli Örn Garðarson.

Sigurjón lét eftir sig konu og fjögur börn. Hann var einn af ástsælustu tónlistamönnum þjóðarinnar af yngri kynslóðinni. Hann hafði meðal annars tekið þátt í Eurovision og var með lag í keppninni þetta árið.