Domenech fær milljón evrur frá franska sambandinu

Raymond Domenech, fyrrum þjálfari franska landsliðsins, og franska knattspyrnusambandið hafa sæst á það að leysa skaðabótamál Domenech, utan réttarsalsins.

Domenech var rekinn frá franska landsliðinu eftir HM 2010 í Suður-Afríku. Verkfallsaðferðir leikmanna liðsins og afar slakt gengi innan vellinum ollu hneykslan bæði innan Frakklands sem og alls fótboltaheimsins.

Domenech vildi frá 2,9 milljónir evra í skaðabætur frá franska sambandinu og franska sambandið vildi á móti fá til baka ofgreidda bónusa frá umræddri Heimsmeistarakeppni í Suður-Afríku.

Samkvæmt heimildum AFP munu aðilar hafa sæst á það að franska sambandið borgi Domenech eina milljón evra eða um 166 milljónir íslenskra króna. Forseti franska sambandsins á reyndar eftir að fá endanlegt samþykki stjórnarinnar fyrir þessu en það þykir líklegast að málið gangi snurðulaust í gegnum stjórnarfund sem fer fram 4. ágúst.

Franska landsliðið varð í öðru sæti á Hm 2006 undir stjórn Domenech en svo fór að halla að fæti og það gekk lítið á bæði EM 2008 sem og á HM í fyrra en í bæði skiptin komst franska landsliðið ekki upp úr riðlakeppninni.