Stærstu tónleikar Agent Fresco

„Þetta verða stærstu tónleikarnir sem við höfum haldið,“ segir Arnór Dan Arnarson, söngvari Agent Fresco.

Rokksveitin heldur útgáfutónleika í Austurbæ í kvöld þar sem platan A Long Time Listening verður spiluð í heild sinni. Öllu verður tjaldað til á tónleikunum enda er ætlunin að líkja sem mest eftir plötunni, sem hefur verið hlaðin lofi. Fimm stúlkna strengjasveit verður á sviðinu, hópur aukahljóðfæraleikara og kór, auk þess sem Haukur Heiðar Hauksson, söngvari Diktu, og Þórður Gunnar Þorvaldsson sjá um að radda.

„Þetta verður næstum því eins og að fara í leikhús. Þetta verður stórglæsilegt, ég get ekki beðið,“ segir Arnór Dan og bætir við: „Við erum ekki að fara að græða á þessum tónleikum. Fólkið sem mætir borgar kostnaðinn við þá.“

Fyrstu tónleikar Agent Fresco voru haldnir í Austurbæ fyrir um þremur árum og staðsetningin í kvöld er því engin tilviljun. „Þetta er pínu nostalgía fyrir okkur,“ segir Arnór. „Miðarnir eru að rjúka út og ef fólk ætlar að mæta á einhverja tónleika með Agent Fresco þá eru það þessir.“

Áhorfendur ættu ekki að vera sviknir því hljómsveitin var nýlega tilnefnd til Íslensku tónlistarverðlaunanna sem tónlistarflytjandi ársins. Arnór Dan var einnig tilnefndur sem rödd ársins auk þess sem A Long Time Listening var tilnefnd sem besta platan.

Tónleikarnir hefjast klukkan 21 og er miðaverð 1.500 krónur í forsölu og 2.000 kr. við inngang.- fb