Brenndu tvö göt á görn í aðgerð

Íslenska ríkið hefur verið sýknað af sjö milljóna skaðabótakröfu konu sem lenti í því að tvö göt voru brennd á görn hennar í ófrjósemisaðgerð á spítala. Ófrjósemisaðgerðin fór fram með þeim hætti að brennt var fyrir eggjaleiðarana. Önnur aðferð og hættuminni er möguleg í sama tilgangi og felst hún í því að klemma fyrir eggjaleiðarana.

Konan fór í aðgerðina í nóvember 2002 og var útskrifuð síðar sama dag. Tíu dögum síðar var hún aftur lögð inn, mikið veik og komin með lífhimnubólgu. Hún fór í aðgerð þar sem götin á görninni komu í ljós. Var garnabútur fjarlægður og endarnir saumaðir saman.

Árið 2003 þurfti hún aftur að leggjast á spítala vegna garnastíflu. Konan vildi sækja bætur vegna saknæmrar og ólöglegrar háttsemi en bótaskyldu ríkisins var vísað á bug og fór málið því fyrir dómstóla.

Í niðurstöðu dómsins segir meðal annars að ekki hafi verið um saknæmt gáleysi að ræða er rafmagnstöngin rakst í garnir konunnar, heldur „sjaldgæft óhappatilvik“. Þá hefði konunni mátt vera fullljóst í hverju aðgerðin væri fólgin og hvaða afleiðingar hún gæti haft, þar sem hún hefði ritað undir eyðublað þar að lútandi.- jss