Bylgjan má ekki spila lögin

Tónlistarmaðurinn Jóhann G. Jóhannsson segir það ekki rétt hjá Pálma Guðmundssyni, framkvæmdastjóra dagskrársviðs 365 miðla, að Bylgjan geti spilað lögin hans þrátt fyrir að hann hafi bannað henni að gera það.

Pálmi sagði við Fréttablaðið í gær að Jóhann hefði leigt höfundarréttinn að sínum lögum til Sambands tónskálda og eigenda flutningsréttar (Stefs) og því gæti Bylgjan spilað lögin áfram. Jóhann segir þetta ekki rétt, hann hafi ekki leigt höfundarrétt sinn til Stefs. Fyrirtækið hafi eingöngu séð um innheimtu á Stef-greiðslum sínum.

„Pálmi hefur greinlega ekki kynnt sér ákvæði varðandi sæmdarrétt höfundar," segir Jóhann. Þar á hann við að ef höfundur telur skaðlegt fyrir sig eða meiðandi að ákveðinn aðili noti hans efni getur hann komið því á framfæri við Stef og í framhaldinu er brugðist við því. Þetta segir í 2. málsgrein 4. greinar höfundarlaga: „Óheimilt er að breyta verki höfundar eða birta það með þeim hætti eða í því samhengi að skert geti höfundarheiður hans eða höfundarsérkenni."

Jóhann segir að þrátt fyrir orð Pálma um að hlutfall íslenskrar tónlistar sé 40% á degi hverjum á Bylgjunni sé gallinn sá að alltaf séu sömu lögin spiluð. Ofspilun sé stórt vandamál á stöðinni.

„Miðað við þau viðbrögð sem ég hef fengið við banninu, sem ég vona að Bylgjan virði, þá tel ég að bannið hafi verið tímabært," segir Jóhann og bætir við að yfir 1.600 manns hafi lýst yfir stuðningi við það á netinu.- fb