Sex þúsund lán enn í óvissu

Íslandsbanki hefur enn ekki skilað endurútreikningi þriðjungs gengistryggðra húsnæðis- og bílalána viðskiptavina sinna þótt mánuður sé liðinn frá því að frestur bankans til þess rann út lögum samkvæmt. Engin viðurlög eru við drætti á endurútreikningnum.

Endurreikna þurfti um 17 þúsund gengistryggð lán samkvæmt upplýsingum frá bankanum. Búið er að endurreikna um 11 þúsund þeirra en um 6 þúsund eru eftir. Gengistryggð lán voru dæmd ólögleg í Hæstarétti í júní í fyrra. Í lok desember var lögum um vexti og verðtryggingu frá 2001 breytt á Alþingi en samkvæmt þeim bar fjármálafyrirtækjum að hafa frumkvæði að uppgjöri lánanna. Lögin tóku gildi 28. desember en samkvæmt þeim áttu fjármálafyrirtækin að senda viðskiptavinum sínum útreikning á nýjum höfuðstól eigi síðar en 60 dögum eftir að nýju lögin tóku gildi. Uppgjör lána átti að fara fram innan 30 daga frá endurútreikningi. Sá dagur rennur upp á morgun.

Erlend lán Íslandsbanka voru talsvert fleiri en hjá hinum stóru viðskiptabönkunum. Að sögn Kristjáns Kristjánssonar, upplýsingafulltrúa Landsbankans, er búið að gera upp öll þau 2.800 húsnæðislán í erlendri mynt sem voru hjá bankanum. Eftir er að reikna um eitt prósent 2.300 erlendra lána hjá Arion banka. Svipaða sögu er að segja hjá fjármögnunarfyrirtækjum í eigu bankanna.

„Ég hef heyrt að það séu erfiðustu og flóknustu málin sem eru eftir,“ segir Ásta Sigrún Helgadóttir, umboðsmaður skuldara. Hjónaskilnaðir, framsal á samningum og fleira flækir uppgjörin. Hún segir frestinn sem fjármálafyrirtækjunum var gefinn hafa verið til viðmiðunar. Legið hafi fyrir að útreikningar yrðu flóknir.

„Við gerum ráð fyrir að fjármálastofnanir og þrotabú sem eru með svona lán fari eftir ákvæði laganna. Fjármálaeftirlitið á að sjá til þess að fyrirtækin fari að lögum og virði góða viðskiptahætti,“ segir Árni Páll Árnason, efnahags- og viðskiptaráðherra. - kh, jab