Rúrik: Hermann geðbilaður í hausnum

Stemningin hefur greinilega verið góð í herbúðum íslenska landsliðsins í knattspyrnu en það mætir í dag Kýpverjum ytra í undankeppni EM 2012.

Strákarnir voru duglegir að henda hvorum öðrum í sundlaugina á hóteli liðsins í gær. Fyrst reyndi hópur manna að koma Hermanni ofan en það tókst ekki. Svo var komið að Hermanni að grýta Rúrik út í laug sem tókst ekki betur að báðir enduðu á því að fá sér sundsprett.

Rúrik hitti Arnar Björnsson á Kýpur í dag og má sjá viðtalið allt hér fyrir ofan. Arnar spurði Rúrik af hverju Hermanni hafi verið svo mikið í mun að ná fram hefndum í dag.

„Ég tók hann svo svakalega í gær, eins og sjá mátti á andlitinu hans. Hann hefur verið eitthvað leiður yfir því og fengið fleiri með sér í lið því hann ræður ekki við mig einn," sagði Rúrik sposkur á svip. „Hann er alls ekki sterkur - hann fær bara svo marga með sér í lið."

„Jú, auðvitað er hann nautsterkur og svo geðbilaður í hausnum. Maður er aldrei nógu snargeðveikur í hausnum til að nenna standa í þessu," bætti Rúrik við.

Hann ræddi líka um leik dagsins og þá á aðeins hefðbundnari nótum. „við erum staðráðnir í að vinna þá. Við spiluðum ágætlega gegn þeim síðast og ætlum að gera betur núna," sagði Rúrik en Ísland og Kýpur skildu jöfn í markalausum vináttulandsleik í fyrra.

„Við komum inn í þennan leik með sjálfstraust og þeirri trú að við getum unnið þá. Við erum tilbúnir að leggja okkur alla fram til að kom aheim með þrjú stig."

´Leikurinn við Kýpur hefst klukkan 18.00 í dag og verður í beinni útsendingu á Stöð 2 Sport.