Irene sögulegur fellibylur

„Allt bendir til þess að Irene verði sögulegur fellibylur," sagði Barack Obama, bandaríkjaforseti, á blaðamannafundi fyrr í dag og hvatti fólk til að undirbúa sig vel fyrir komu fellibylsins.

Ef stormurinn nær til New York borgar í styrktarflokki 2, eins og menn óttast, verður hann sterkasti fellibylur álfunnar frá árinu 1991. Hann gæti haft áhrif á allt að 65 milljónir manns, sem er einhver mesti fjöldi sem nokkurn tíma hefur orðið fyrir áhrifum frá einum stormi.

Obama, sem hefur verið í sumarleyfi undanfarna daga, mun snúa aftur til Washington til að stjórna viðbrögðum ríkisstjórnarinnar við storminum.