Ástæðulaust að óttast geislavirkni á Íslandi

Ekki er ástæða til þess að óttast geislavirkni á Íslandi né í Evrópu vegna kjarnorkuslyssins í Japan. Þetta kemur fram í tilkynningu frá Geislavörnum ríkisins.

Þar segir einnig að geislavirk efni frá kjarnorkuslysinu í Japan, hafi borist til Evrópu og geta Geislavarnir nú staðfest að örlítil geislavirkni frá kjarnorkuverinu í Fukushima hefur mælst í mælistöð sem stofnunin rekur í Reykjavík.

Svo segir orðrétt:

„Gera má ráð fyrir að geislavirk efni frá kjarnorkuslysinu í Japan mælist áfram á Íslandi og annar staðar í Evrópu á næstu dögum og vikum. Efnin geta orðið mælanleg um allan heim (svipað og aska frá Eyjafjallajökli) en geislun frá þeim á fjarlægum slóðum er hverfandi og heilsufarsleg áhrif þeirra engin. Gera má ráð fyrir að geislavirknin geti orðið 1/1000 – 1/10 000 hluti þess sem mældist í Evrópu eftir slysið í Chernobyl 1986 en þá mældist mjög lítil geislavirkni á Íslandi."