Súdan: Nýtt ríki verður stofnað í júlí

Súdan verður formlega skipt í tvö ríki, Norður- og Suður-Súdan, 9. júlí næstkomandi. Yfirgnæfandi meirihluti íbúa Suður-Súdans, um 98,8 prósent, greiddi aðskilnaðinum atkvæði sitt í þjóðar­atkvæðagreiðslu.

Mikið verk bíður nú stjórnvalda í ríkjunum tveimur. Samþykkja þarf ný landamæri, hvernig skuldir og eignir skiptast milli landanna og hvernig olíulindir á landamærunum eigi að skiptast, að því er fram kemur á vef BBC.

Stjórnvöld í Súdan hafa verið harðlega gagnrýnd fyrir misskiptingu auðs frá olíulindum landsins, sem hefur aðallega farið í uppbyggingu í norðurhluta landsins.

Súdan fékk sjálfstæði frá Bretlandi árið 1956. Borgarastyrjöld ríkti í landinu til ársins 1972, og braust aftur út tíu árum síðar. Talið er að yfir tvær milljónir manna hafi fallið í styrjöldinni.

Friðarsamkomulag var undir­ritað árið 2005, og hluti af því samkomulagi var sátt um að haldin yrði þjóðaratkvæðagreiðsla í suðurhluta landsins um hvort skipta ætti landinu í tvennt. Stjórnvöld í landinu hafa heitið því að koma ekki í veg fyrir sjálfstæði Suður-Súdans.

Mikill munur er á landslagi og lífsháttum fólks í norður- og suðurhluta þessa stærsta ríkis Afríku. Í norðurhlutanum, sem er ríkari, er meirihluti íbúanna múslimar en sunnar í landinu eru kristnir og fólk sem er andatrúar í meirihluta.

Í norðurhluta landsins er þurrt landslag og eyðimörk, en frumskógar og mýrar í suðurhlutanum. Um 44 milljónir manns búa í Súdan. - bj