„Aðför að heiðri Inga Freys"

Reynir Traustason, ritstjóri DV, segir frétt Morgunblaðsins um tengsl blaðsins og Wikileaks og hugsanlega greiðslu fyrir stolin gögn aðför að heiðri Inga F. Vilhjálmssonar blaðamanns DV. Morgunblaðið segir Inga með réttarstöðu grunaðs manns í rannsókn lögreglunnar á málinu.

„Þetta er aðför að heiðri Inga Freys en annars vill maður sem minnst um málið segja á þessari stundu," segir Reynir Traustason. Hann segir Inga ekki kannast við að vera með réttarstöðu grunaðs manns. „Málinu verður svarað í dag af lögfræðinga Inga," segir Reynir.

Vernda heimildarmenn

Í frétt Morgunblaðsins er njósnatölvumálið á Alþingi tengt við stolin gögn úr tölvu lögmanns þekktra einstaklinga en fréttir byggðar á þessum gögnum hafa birst í fjölmiðlum. Ungur karlmaður var handtekinn í tengslum við málið grunaður um að hafa brotist inn í fyrirtæki og stolið gögnunum. Morgunblaðið segir hann nú starfa fyrir Wikileaks í London.

Málin tengjast meðal annars Karli Wernerssyni og Eiði Smára Guðjohnsen. Blaðamaður Morgunblaðsins staðhæfir að Ingi Freyr hafi réttarstöðu grunaðs manns því vitni hafi sagt hann hafa beðið unga drenginn að stela fyrir sig gögnunum gegn þóknun.

Reynir segir það alþekkt að Agnes Bragadóttir, sem skrifar fréttina í Morgunblaðið, hafi horn í síðu DV og þá ekki síður Davíð Oddsson ritstjóri blaðsins. „Þetta er tilraun til að segja frétt án þess að hafa fóður í það. Það er öllum ljóst að fjölmiðlar geta ekki tekið þátt í umræðu um meinta heimildarmenn. Það ríkir fullkomið traust milli heimildarmanna okkar og blaðsins og auðvitað á Agnes að vita það."

Agnes Bragadóttir segir í grein sinni að samkvæmt upplýsingum Morgunblaðsins hafi Ingi Freyr stöðu grunaðs manns „í rannsóknum lögreglu".

Ekki með réttarstöðu sakbornings

Vísir hafði samband við lögregluna í Reykjavík vegna málsins. Björgvin Björgvinsson, yfirmaður rannsóknardeildar lögreglunnar, sagði Inga Frey ekki með stöðu sakbornings eða grunaðs manns í tengslum við njósnatölvumálið á Alþingi.

„Hann er ekki með stöðu sakbornings í þessu máli og hefur aldrei verið yfirheyrður." Spurður út í málið sem tengist hinum stolnu gögnum sagðist Björgvin ekkert geta fullyrt um réttarstöðu Inga í því máli.