Fimm ára féll af tíundu hæð og slapp ómeidd

Fimm ára gömul kínversk stelpa, Ye Zixu, slapp ótrúlega vel þegar hún datt út um gluggann heima hjá sér í borginni Chongqing í Kína. Hún býr á tíundu hæð þannig að fallið niður á götu var um 33 metrar. Stelpan lenti reyndar á skyggni yfir anddyri byggingarinnar og stöðvaðist þar.

Vitni voru að fallinu og héldu þau fyrst að rauð dúkka hefði fallið út um gluggann. Þau hlupu til og einn klifraði upp á skyggnið og þar var stelpan að reisa sig við, ómeidd. Hún er reyndar greinilega með óheppnari krökkum, því hún hrasaði og datt niður af skyggninu.

Þá gekk gæfan í lið með henni og var hún gripin af vegfaranda, sem rauk með hana á sjúkrahús. Henni varð þó sama sem ekkert meint af fallinu, fékk aðeins mildan heilahristing.