Mark Rutgers búinn að semja við Víkinga

Hollenski miðvörðurinn Mark Rutgers er búinn að gera eins árs samning við nýliða Víkings í Pepsi-deild karla í fótbolta en hann er fimmti leikmaður sem gengur til liðs við 1. deildarmeistarana síðan að liðið tryggði sér aftur sæti meðal þeirra bestu.

Rutgers gekk frá samningnum í dag en hann gildir út leiktíðina. KR-ingar vildu reyna að halda þessum 24 ára gamla miðverði en hann hefur spilað með liðinu undanfarin tvö sumur og alls 36 leiki í efstu deild.

Mark Rutgers kemur í staðinn fyrir Milos Glogovac sem hefur leikið með Víkingum undanfarin fimm ár en það slitnaði upp úr samningaviðræðum Víkinga við Glogovac fyrir jól.

Víkingar höfðu áður fengið til sín Björgólf Takefusa frá KR, Pétur Georg Markan frá Fjölni, Baldur Ingimar Aðalsteinsson frá Val og Hörður Sigurjón Bjarnason frá Þrótti. Það er ljóst á þessu að Víkingar ætla sér stóra hluti í Pepsi-deildinni í sumar.