Enn fjöldi manns á Frelsistorginu í Kairó

Ró hefur færst yfir Kairó höfuðborg Egyptalands eftir sigur mótmælenda í gær þegar Hosni Mubarak sagði af sér embætti forseta. Þó nokkur fjöldi fólks er þó enn á Frelsistorginu en fólk er yfirvegað og talar um væntingar sínar fyrir lýðræðislegu Egyptalandi í framtíðinni.

Hermenn eru byrjaði að fjarlægja vegatálma umhverfis torgið, en margir þeirra tóku þátt í fagnaðarlátum almennings í gærkvöldi og nótt. Mikill fjöldi fólks dansaði og söng um götur borgarinnar í nótt og flugeldum var skotið á loft. Fólkið hrópaði „Egyptaland er frjálst".

Mubarak fól hernum stjórn landsins við afsögnina en ekki liggur fyrir hvenær verður boðað til kosninga í landinu og þar með hvað stjórn landsins verður lengi í höndum hersins. Herinn hefur þó lýst því yfir að hann styðji veginn til lýðræðis og hann muni tilkynna fljótlega um næstu skref.

Um 300 manns féllu í hinum 18 daga mótmælaaðgerðum, flestir þegar óeinkennisklæddir lögreglumenn og málaliðar Mubaraks réðust á mótmælendur á fyrstu dögum aðgerðanna í þeirri von að geta leyst mótmælin upp.